Sunday, January 17, 2010

പ്രണയരസം


ചെങ്കണ്ണു പിടിച്ചവൻ കടലിൽ
മുങ്ങിക്കുളിക്കുമ്പോലെയാണെനിക്കു പ്രണയം
ചെറുമീനുകൾ ചൊറികൊത്തുമ്പോഴുണ്ടാകുന്ന
സുഖമാണെന്‍റെ പ്രണയത്തിന്
പുളിയൻ മാങ്ങകൾ പല്ലു പുളിപ്പിക്കുമ്പോലെയാണ്
നീയെന്നോടു പ്രണയം പറയുന്നത്
ചോണനുറുമ്പുകൾ അടിയുടുപ്പിൽ പെടുമ്പോലെയാണ്
നിന്നെയെനിക്ക് നീ പകുക്കുന്നത്
എങ്കിലും
ഈ എരിച്ചിലല്ലോ എന്‍റെ
മുറിവുകളെ ഉണർത്തുന്നത്
പൊടിയും നീറ്റലല്ലോ എന്‍റെ
മുറിവായകളെ തുന്നുന്നത്
പല്ലിൻ പുളിപ്പല്ലോ എന്‍റെ
പ്രജ്ഞയെ പൊള്ളിക്കുന്നത്
ഈ പൊറുതികേടല്ലോ എന്‍റെ
മനസ്സിനെ നീറ്റി വെടിപ്പാക്കുന്നത്

1 comment: